ایرانی بحری جہازوں کو غزہ جانے سے نہیں روکیں گے: مصری عہدیدار

مصر میں نہر سوئز انتظامیہ کے ایک سرکاری عہدیدار نے کہا ہے کہ انتظامیہ کو ایران سمیت کسی ملک کی جانب سے نہر سوئز سے گزرنے کی اجازت کے لیے درخواست موصول نہیں ہوئی ہے تاہم ہماری جانب سے امدادی سامان لیکر غزہ آنے والے کسی بھی ایرانی جہاز کا راستہ روکا نہیں جائے گا۔ معروف مصری اخبار ’’اھرام‘‘ نے نہر سوئز کے امور کے ذمہ دار کے حوالے سے کہا ہے کہ ’’ نہر سوئز انتظامیہ ایرانی جہازوں کے خلاف کوئی کارروائی نہیں کرے گی۔ انہوں نے کہا کہ معاہدہ قسطنطنیہ کے مطابق کسی بھی ملک کے بحری جہاز کو نہر سوئز سے گزرنے کی اجازت ہے۔ واضح رہے کہ ایران میں موجود ہلال احمر تنظیم نے غزہ کی پٹی کا چار سال سے جاری اسرائیلی محاصرہ توڑنے کے لیے امدادی سامان پر مشتمل بحری جہاز غزہ کی پٹی بھیجنے کا فیصلہ کیا ہے۔ اس جہاز کے ذریعے ضروریات زندگی اور ادویات اہل غزہ تک پہنچائی جائیں گی۔