اوباما کی محمود عباس کو اسرائیل کیخلاف مذمتی قرارداد لانے کے اصرار پر سنگین نتائج کی دھمکی

مقبوضہ مغربی کنارے میں فلسطینی اتھارٹی کے حکام نے انکشاف کیا ہے کہ حا ل ہی میں امریکی صدر براک اوباما نے صدر محمود عباس کو ٹیلی فون کر کے انہیں سلامتی کونسل میں اسرائیل کی یہودی بستیوں کی تعمیر کے خلاف مذمتی قرارداد پیش نہ کرنے کو کہا ہے. فلسطینی حکام کا کہنا ہے کہ امریکی صدرنے ٹیلیفون پر محمودعباس کو سلامتی کونسل میں اسرائیل کےخلاف قرارداد لانے پر سنگین نتائج کی دھمکی دی ہے. فلسطینی تھارٹی کے ایک سینئر عہدیدار نے اپنا نام ظاہر نہ کرنے کی شرط پر فرانسیسی خبررساں ایجنسی اے ایف پی کو بتایا کہ امریکی صدرنے نہایت سخت لہجے میں صدر محمودعباس کو یک طرفہ طور پر اسرائیل کے خلاف سلامتی کونسل میں کوئی قرارداد پیش کرنے پر دھمکی دی. براک اوباما نے کہا کہ فلسطینی اتھارٹی کی جانب سے سلامتی کونسل میں فلسطینی علاقوں میں یہودی بستیوں کی تعمیر پر تل ابیب کےخلاف کوئی قرارداد لائی گئی تو امریکا اس کی مخالفت کرے گا. انہوں نے مزید کہا کہ امریکا یہ سمجھتا ہے کہ فلسطین اور اسرائیل کے درمیان تنازعات بات چیت کے ذریعے حل ہوں اور اسرائیل کےخلاف کوئی یک طرفہ کارروائی نہ کی جائے. انہوں نے دھمکی دی کہ اگر فلسطینی اتھارٹی نے انتباہ کے باوجود سلامتی کونسل میں اسرائیل کےخلاف کوئی قرارداد پیش کی تو اس کے نتیجے میں اتھارٹی کی مالی امداد بند کر دی جائے گی. فلسطینی عہدیدار نے کہا کہ امریکی صدر کی دھمکی کے جواب میں صدر محمودعباس سے چپ سادھے رکھی اور انہیں یہ نہیں بتایا کہ سلامتی کونسل میں یہودی بستیوں کے تسلسل پر اسرائیل کےخلاف قرارداد خطے میں قیام امن کے لیے ضروری ہے. خیال رہے کہ امریکا بظاہر فلسطین میں اسرائیل کی جانب سے یہودی بستیوں کی تعمیر کی مخالفت کرتا ہے لیکن مناسب فورم پر اسرائیل مخالف کسی بھی قرارداد کو ویٹو کر کے خود اپنے قول و فعل میں تضاد ثابت کر رہا ہے.