انقرہ ۔ مرکزاطلاعات فلسطین فاؤنڈیشن
ترکیہ کے دارالحکومت انقرہ کے تعلیمی اداروں نے قابض اسرائیل کی جانب سے کی جانے والی تباہ کن نسل کش جنگ کے بعد غزہ کی تعمیرنو میں مدد کیلئے 10 کروڑ 14 لاکھ 70 ہزار ترک لیرا (تقریباً اڑھائی ملین امریکی ڈالر) جمع کیے ہیں۔
انقرہ کے گورنر واصب شاہین نے یہ رقم کی شکل میں چیک ترکیہ کی آفات و ہنگامی حالات سے نمٹنے والی اتھارٹی “آفاد” کے سربراہ علی حمزہ بہلوان کو پیش کیا۔ یہ عطیہ “ایک سکول، ہزار امیدیں – غزہ خیراتی بازار” نامی مہم کے تحت جمع کیا گیا جو دارالحکومت کے تعلیمی اداروں میں منعقد ہوئی۔
دورانِ تقریب آفاد کے ہیڈکوارٹر کے دورے کے موقع پر علی حمزہ بہلوان نے وزیر تعلیم یوسف تکین، اساتذہ اور والدین کا شکریہ ادا کرتے ہوئے کہا کہ ترکیہ کے عوام صدر رجب طیب ایردوآن کی قیادت میں غزہ کے مظلوم عوام کی انسانی امداد کے لیے اپنی کوششیں پوری قوت سے جاری رکھے ہوئے ہیں۔
گورنر واصب شاہین نے وضاحت کی کہ خیراتی بازار کی سرگرمیوں کے دوران جمع کی جانے والی رقم، جس میں 1847 سرکاری اور نجی سکولوں نے حصہ لیا جن میں سے 335 نجی ادارے تھے، آفاد کے حوالے کر دی گئی ہے تاکہ یہ امداد براہ راست غزہ کے متاثرہ اہلِ وطن تک پہنچائی جا سکے۔
ان کا کہنا تھا کہ “ہم نے یہ رقم آفاد کے سربراہ کے حوالے کر دی ہے، جو اسے ہمارے بھائیوں اور بچوں تک غزہ میں پہنچانے کی ذمہ داری سنبھالے گی۔”
غزہ کے سرکاری میڈیا آفس کے مطابق قابض اسرائیل کی جانب سے دو سال سے جاری اجتماعی قتل عام اور نسل کشی کے نتیجے میں 24 لاکھ کی آبادی میں سے تقریباً 20 لاکھ فلسطینی اپنے گھروں سے بے دخل ہو چکے ہیں۔ اب بھی 2 لاکھ 88 ہزار خاندان بے گھر ہیں اور ان کے مکانات مکمل طور پر تباہ کر دیے گئے ہیں، جب کہ یہ متاثرین انتہائی تنگ اور پسماندہ علاقوں میں زندگی گزارنے پر مجبور ہیں جہاں زندگی کی بنیادی ضروریات کا شدید فقدان ہے۔
رپورٹ کے مطابق قابض اسرائیل اب بھی جنگ بندی کے معاہدے کے پہلے مرحلے کے تحت غزہ کی پچاس فیصد سے زائد زمین پر قابض ہے۔ یاد رہے کہ 10 اکتوبر کو حماس اور قابض اسرائیل کے درمیان ہونے والے جنگ بندی معاہدے نے اس خونریز جنگ کا خاتمہ کیا جو 8 اکتوبر سنہ2023ء کو شروع ہوئی تھی۔ اس ظالمانہ جنگ میں 68 ہزار 865 فلسطینی شہید اور 1 لاکھ 70 ہزار 670 زخمی ہوئے جن میں اکثریت خواتین اور بچوں کی تھی۔
