بیت المقدس – (مرکزاطلاعات فلسطین فاؤنڈیشن) القدس انٹرنیشنل فاؤنڈیشن نے القدس شہر میں 28 فروری سنہ 2026ء سے کنيسہ القيامہ کی مسلسل بندش کی شدید الفاظ میں مذمت کرتے ہوئے اسے آزادی عبادت کی کھلی خلاف ورزی قرار دیا ہے۔ ادارے کا کہنا ہے کہ یہ اقدام ایک ایسا نیا رخ مسلط کرنے کی کوشش ہے جس سے مقدس شہر کے مذہبی تنوع کو سنگین خطرات لاحق ہو گئے ہیں۔
فاؤنڈیشن نے اپنے ایک بیان میں واضح کیا کہ قابض اسرائیلی حکام خطے میں جاری فوجی کشیدگی کا بہانہ بنا کر اور نام نہاد عوامی سکیورٹی کی آڑ میں مسیحی برادری کو ایسٹر کے موقع پر کنيسہ القيامہ کے اندر اپنی مذہبی رسومات ادا کرنے سے مسلسل روک رہی ہے۔
بیان میں اس بات پر زور دیا گیا کہ مسیحیوں کو ان کے گرجا گھروں اور خاص طور پر کنيسہ القيامہ تک رسائی سے محروم کرنا ایک ایسا جرم ہے جو مسجد اقصیٰ پر مسلط کردہ تالا بندی کی پالیسیوں کا تسلسل ہے۔ یہ اقدامات اس منظم پالیسی کی عکاسی کرتے ہیں جس کا مقصد القدس میں غیر یہودی وجود کو ختم کرنا ہے۔
فاؤنڈیشن نے مزید بیان کیا کہ گریٹ فرائیڈے اور سبت النور کے موقع پر گرجا گھر کے اندر دعائیہ تقاریب اور مذہبی جشن کو صرف پادریوں تک محدود کرنا صدیوں میں پہلی بار ہوا ہے، جو ایک ایسا جابرانہ فیصلہ ہے جسے سکیورٹی کے نام پر جواز فراہم کرنے کی کوشش کی جا رہی ہے۔
القدس انٹرنیشنل فاؤنڈیشن نے سختی سے کہا کہ یہ اقدامات القدس کی اس تاریخی حیثیت یا وضع قائم کی خلاف ورزی ہیں جو بغیر کسی پابندی کے مقدس مقامات تک رسائی کی ضمانت دیتی ہے اور قابض اسرائیل کی حکام کو ان کے معاملات میں مداخلت سے روکتی ہے۔ یہ سب کچھ اسلامی اور مسیحی مقدسات پر اپنی نام نہاد حاکمیت مسلط کرنے کی کوششوں کا حصہ ہے۔
بیان کے مطابق یہ پالیسیاں اس رجحان کا حصہ ہیں جس کا مقصد القدس پر ایک یکطرفہ مذہبی شناخت مسلط کرنا ہے، جس کے لیے اسلامی اور مسیحی موجودگی کو کم کر کے اسے محض ایک رسمی وجود میں تبدیل کیا جا رہا ہے۔
فاؤنڈیشن نے فلسطین اور دنیا بھر کے مسیحیوں سمیت تمام کلیساؤں اور انسانی حقوق کے اداروں سے اپیل کی ہے کہ وہ ان ظالمانہ اقدامات کو مسترد کریں اور القدس میں مسیحی وجود کو برقرار رکھنے اور انہیں بغیر کسی پابندی کے اپنی مذہبی رسومات کی ادائیگی کو یقینی بنانے کے لیے عملی جدوجہد کریں۔
