الخلیل میں انتہاء پسند یہودیوں کے حملے میں ایک فلسطینی شہید

مغربی کنارے کے سب سے بڑے ضلع الخلیل میں یہودی آبادکاروں نے صافا کے علاقے پر دھاوا بولا اور فلسطینی شہریوں کے گھروں پر شدید پتھراؤ کیا جس میں 17 سالہ یوسف فخری موسی اخلیل نامی شہری شہید جبکہ متعدد افراد زخمی ہو گئے ہیں۔ علاقائی میڈیکل ذرائع نے بتایا کہ زخمی نوجوان اخلیل کو شدید زخمی حالت میں ہسپتال لایا گیا تھا ان کے سر پر گہرے زخم آئے تھے جن کی تاب نہ لاتے ہوئے وہ چل بسا، خیال رہے کہ ڈیڑھ سو قریب یہودی آبادکاروں کی جانب سے الخلیل کے شمالی علاقے بیت امر پر حملہ کیا تھا جس کے بعد مقامی فلسطینیوں اور ان انتہاء پسند یہودیوں میں جھڑپیں شروع ہو گئیں۔ عینی شاہدین کے مطابق یہودی آبادکار اسلحہ سے لیس تھے اور اس موقع پر انہوں نے شہریوں پر فائرنگ بھی کی۔ اسی فائرنگ میں یوسف شہید ہوا۔