اسرائیل نے مسجد اقصیٰ کے مراکشی دروازے کے سامنے پُل کی تعمیر شروع کر دی

مسجد اقصیٰ کی تعمیرومرمت اور تحفظ میں سرگرم تنظیم اقصیٰ فاٶنڈیشن وٹرسٹ نے انکشاف کیا ہے کہ اسرائیلی بلدیہ اور القدس کی ایگزیکٹو اتھارٹی نے مسجد اقصیٰ کے تاریخی دروازے باب المغاربہ کے سامنے ایک پُل کی تعمیر کا کام شروع کر دیا ہے. اس پل کی تعمیر کا مقصد یہودی آبادکاروں کی قبلہ اول تک رسائی اور یہودی فوج کے لیے اس مقدس مقام پر حملے کے لیے راہ ہموار کرنا ہے. اقصیٰ فاٶنڈیشن کی جانب سے جاری ایک تازہ بیان میں اسرائیل کے اس مذموم منصوبے کی تفصیلات جاری کی گئی ہیں. بیان میں کہا گیا ہے کہ اسرائیل کی طرف سے مراکشی دروازے کے سامنے پل کی تعمیر صہیونی عدالت کی طرف سے دیے گئے فیصلے کے بعد شروع کی گئی ہے. اسرائیلی عدالت نے چند روز قبل ایک مقدمے کی سماعت کے دوران مسجد اقصیٰ کے مراکشی دوازے اور مقام براق کے درمیان ایک پل کی تعمیر کی منظوری دی تھی. اس مقام پر پل کی تعمیر کے بعد یہودیوں کو براہ راست مسجد اقصیٰ میں داخل ہونے کا موقع ملے گا. بیان میں عینی شاہدین کے حوالے سے بتایا ہے کہ اسرائیلی عدالت کی طرف سے پل کی تعمیر کی اجازت ملنے کے بعد اسرائیلی بلدیہ نے تعمیرات کے لیے سامان کی فراہمی شروع کر دی ہے جبکہ پل کی تعمیر کے لیے سروے بھی شروع کیا گیا ہے. پل کی تعمیر کے لیے مجوزہ جگہ سے غیرضروری چیزیں ہٹا کر اسے خالی کیا گیا ہے. اقصیٰ فاٶنڈیشن نے اسرائیل کے اس مذموم منصوبے کی شدید مذمت کرتے ہوئے مسجد اقصیٰ کے حوالے سے نہایت خطرناک قرار دیا ہے. بیان میں کہا گیا ہے کہ مراکشی دروازے اور مقام براق کے درمیان پل کی تعمیر کے نہایت تباہ کن نتائج برآمد ہوں گے. فاٶنڈیشن نے پل کی تعمیر رکوانے کے لیے عالم اسلام سے مداخلت کی اپیل کرتے ہوئے فلسطینی شہریوں پر بھی زور دیا ہے کہ وہ قابض صہیونی حکومت کے غاصبانہ اقدامات کے خلاف سخت احتجاج کریں.