اسرائیلی فوج کی غزہ میں دراندازی، کھیتوں کو بلڈوزروں سے اکھیڑ دیا گیا

اسرائیلی فوج کی جانب سے غزہ کی پٹی میں دراندازیوں کا سلسلہ بدستور جاری ہے۔ مرکز اطلاعات فلسطین کے ذرائع کے مطابق قابض فوج نے غزہ کے البریج کیمپ کے قریب دراندازی کےدوران مقامی شہریوں کی زرعی زمینوں پر بلڈروز چلا کر انہیں اکھیڑ دیا ہے۔ ادھر عینی شاہدین کے مطابق قابض فوج کی بڑی تعدد بکتربند گاڑیوں ، ٹینکوں اور بلڈوزروں کے ہمراہ البریج کیمپ سے کے قریب سے شہر میں داخل ہوئی۔ اس دوران فوج نے بلڈوزروں کےذریعے زرعی زمینوں اور کھیتوں کو اکھاڑ کر انہیں ناقابل کاشت بنا دیا۔ اس دوران قابض فوج نے متعدد مقامات پر فائرنگ اور گولہ باری بھی کی تاہم اس میں کسی قسم کے جانی نقصان کی اطلاع موصول نہیں ہو سکی۔ دو روز قبل سرحدی حدود کی خلاف ورزی کرتے ہوئے قابض فوج نے غزہ میں گھس کراپنے گھر کے باہر کھڑے ایک شخص کو فائرنگ کرکے شہید کر دیا تھا، جبکہ رواں سال کے دوران دراندازیوں کے دوران کم از کم آٹھ افراد کو گولیاں مارکر شہید کر دیا گیا۔