حماس نے اپنے بیان میں کہا کہ اس کارروائی کا نفاذ قابض اسرائیل کے نام نہاد وزیر برائے قومی سکیورٹی ایتمار بن گویر کی براہ راست نگرانی میں کیا گیا جو غیر معمولی سرکاری غرور اور اقوام متحدہ ،اس کے اداروں اور عالمی برادری کے لیے دانستہ تحقیر کا مظہر ہے۔
حماس نے واضح کیا کہ انروا کو نشانہ بنانا قابض اسرائیل کی اس منظم پالیسی کا حصہ ہے جس کا مقصد اس ادارے کے کردار کو کمزور کرنا اور اسے فلسطینی پناہ گزینوں کے مسئلے پر ایک عالمی گواہ کی حیثیت سے مٹانا ہے۔
حماس نے عالمی سطح پر اس مجرمانہ طرز عمل کی بھرپور مذمت کا مطالبہ کرتے ہوئے فوری اقدام کی اپیل کی تاکہ قابض اسرائیل کو انروا اس کے دفاتر اور تنصیبات کو نشانہ بنانے سے روکا جا سکے اور ادارے کو اقوام متحدہ کی جانب سے دیے گئے مینڈیٹ کے مطابق اپنے فرائض انجام دینے کا موقع ملے نیز اس کے لیے قانونی اور سیاسی تحفظ کو یقینی بنایا جائے۔
حماس نے اس امر پر زور دیا کہ انروا فلسطینی پناہ گزینوں کے حقوق کے تحفظ کا ایک بنیادی ستون ہے جن میں سرفہرست حق واپسی ہے اور اس کے کردار کو نقصان پہنچانا یا اسے بے معنی بنانا نہایت خطرناک نتائج کا باعث بن سکتا ہے۔
حماس نے عالمی قانونی اور انسانی حقوق کے اداروں سے بھی مطالبہ کیا کہ وہ قابض اسرائیل کے رہنماؤں کا پیچھا کریں اور فلسطینی عوام کے خلاف جاری جرائم پر انہیں بین الاقوامی عدالتوں میں کٹہرے میں لائیں جن میں مقبوضہ فلسطینی علاقوں میں کام کرنے والے اقوام متحدہ کے اداروں پر حملے بھی شامل ہیں۔
اسی تناظر میں نام نہاد اسرائیلی لینڈ اتھارٹی اور قابض اسرائیل کی پولیس نے انروا کے اس کمپلیکس پر قبضہ کر لیا اور اعلان کیا کہ اب یہ ریاستی انتظام میں آئے گا اس کی منصوبہ بندی کی جائے گی اور اسے ایسے انداز میں استعمال کیا جائے گا جسے وہ عوامی مفاد قرار دیتے ہیں۔
یہ مسماری کی کارروائیاں براہ راست قابض اسرائیل کے انتہا پسند وزیر برائے قومی سکیورٹی ایتمار بن گویر کی نگرانی میں انجام دی گئیں۔
گذشتہ 14 تاریخ کو انروا نے خبردار کیا تھا کہ مقبوضہ القدس میں اس کی دہائیوں پر محیط موجودگی کے خاتمے کا خطرہ بڑھتا جا رہا ہے کیونکہ قابض اسرائیل کی جانب سے ایسے شرمناک اقدامات کیے جا رہے ہیں۔
ایجنسی نے اس وقت زور دے کر کہا تھا کہ قابض اسرائیل کی یہ کارروائیاں اس مسلسل مہم کا حصہ ہیں جس کا مقصد انروا کو مقبوضہ مشرقی القدس میں اقوام متحدہ کی جنرل اسمبلی کی جانب سے دی گئی ذمہ داریاں ادا کرنے سے روکنا ہے جبکہ یہ علاقہ قابض اسرائیل کی خود ساختہ خودمختاری میں شامل نہیں۔
