اسرائیلی فائرنگ سے غزہ کے دو فلسطینی مزدور زخمی

اسرائیلی فوج نے شمالی غزہ کی مشرقی سرحد پر کام کرنے والے فلسطینی مزدور کو ایک مرتبہ پھر فائرنگ کا نشانہ بنایا ہے جس میں دو مزدور زخمی ہوگئے ہیں۔ گزشتہ سال مارچ سے تاحال ایسے واقعات میں چھ فلسطینی مزدور شہید جبکہ 131 زخمی ہو چکے ہیں۔ فلسطینی میڈیکل سروسز کے ترجمان ادھم سلمیہ نے بتایا کہ صہیونی فوج نے ایک بار پھر بیت لاھیا میں کام کرنے والے مزدوروں پر فائرنگ کی ہے جس سے تباہ حال عمارتوں کا ملبہ اٹھانے والے دو مزدور زخمی ہوگئے ہیں۔ ذرائع کے مطابق زخمی ہونے والے فلسطینیوں کو ٹانگوں اور پیٹ میں گولیاں لگی ہیں جنہیں کمال عدوان ہسپتال منتقل کردیا گیا ہے۔