بیروت – (مرکزاطلاعات فلسطین فاؤنڈیشن) لبنانی مزاحمت کے عسکری ونگ حزب اللہ نے منگل کی علی الصبح مقبوضہ فلسطین کے شمال میں واقع قابض اسرائیل کے اہم فضائی اڈے رامات ڈیوڈ کو انتحاری ڈرون طیاروں کے ایک بڑے غول سے نشانہ بنایا ہے۔ یہ کارروائی لبنانی علاقوں بشمول بیروت کے جنوبی مضافاتی علاقے ضاحیہ پر قابض اسرائیل کی وحشیانہ عسکری جارحیت اور سفاکیت کے جواب میں کی گئی ہے، جس میں لبنانی حکام کے مطابق درجنوں نہتے شہری شہید اور زخمی ہو چکے ہیں۔
مزاحمت کی جانب سے جاری کردہ بیان میں کہا گیا ہے کہ یہ حملہ صبح پانچ بجے کیا گیا جس میں فضائی اڈے کے ریڈار اسٹیشنوں اور کنٹرول رومز کو درستگی کے ساتھ نشانہ بنایا گیا۔ بیان میں اس بات پر زور دیا گیا ہے کہ یہ آپریشن اس مجرمانہ صہیونی جارحیت کا منہ توڑ جواب ہے جس میں لبنانی شہروں اور بستیوں کو نشانہ بنا کر رہائشی عمارتوں اور شہری تنصیبات کو ملبے کا ڈھیر بنا دیا گیا اور ہزاروں خاندانوں کو ہجرت پر مجبور کیا گیا۔
لبنانی عوام پر صہیونی سفاکیت
بیروت کے جنوبی علاقے ضاحیہ، جو حزب اللہ کا مضبوط گڑھ تصور کیا جاتا ہے، گذشتہ چند گھنٹوں سے قابض اسرائیل کی شدید ترین فضائی غارت گری کا نشانہ بنا ہوا ہے۔ لبنانی سرکاری ذرائع کے مطابق ان حملوں میں گنجان آباد رہائشی علاقوں کو نشانہ بنایا گیا، جس کے نتیجے میں خواتین اور بچوں سمیت متعدد شہری شہید ہو گئے۔ رہائشی عمارتوں اور بنیادی ڈھانچے کو پہنچنے والے نقصانات نے علاقے میں انسانی المیہ جنم دے دیا ہے۔
قابض اسرائیل ان حملوں کو عسکری ڈھانچے کی تباہی کا نام دے رہا ہے، جبکہ لبنانی حکام نے تصدیق کی ہے کہ یہ غارت گری خالصتاً سویلین آبادیوں پر کی جا رہی ہے۔ لبنان کی نازک معاشی اور سیکیورٹی صورتحال کے پیش نظر ان حملوں سے خطے میں ایک وسیع تر جنگ چھڑنے کے خدشات بڑھ گئے ہیں۔
قابض اسرائیلی فوج نے منگل کی صبح بیروت میں حزب اللہ کے مراکز اور اسلحہ گوداموں کو نشانہ بنانے کا دعویٰ کرتے ہوئے ایک وسیع عسکری مہم کا اعلان کیا ہے۔ اسی دوران حزب اللہ کے ملکیتی چینل المنار نے اطلاع دی ہے کہ قابض دشمن کے طیاروں نے ضاحیہ کے علاقے حارہ حریک میں اس کی عمارت کو بھی نشانہ بنایا، جس کے بعد علاقے سے دھوئیں کے سیاہ بادل اٹھتے دیکھے گئے۔
مزید برآں، قابض فوج نے جنوبی لبنان کے 59 دیہات اور بستیوں کے مکینوں کو فوری طور پر گھر بار چھوڑنے کا حکم دیتے ہوئے انہیں ایک کلومیٹر دور منتقل ہونے کی دھمکی دی ہے، جو فلسطینیوں کی نسل کشی کے مترادف ایک اور انسانی المیے کا پیش خیمہ ثابت ہو سکتا ہے۔
دفاع وطن کا حق
رامات ڈیوڈ فضائی اڈہ مقبوضہ فلسطین کے شمال میں قابض اسرائیل کا کلیدی عسکری مرکز ہے جہاں سے شمالی محاذ پر فضائی کارروائیاں کنٹرول کی جاتی ہیں۔ مزاحمت نے واضح کیا ہے کہ اس کی کارروائی صرف عسکری اہداف تک محدود تھی اور یہ اپنی سرزمین اور عوام کے دفاع کا شرعی و قانونی حق ہے۔
صہیونی جارحیت روکنا عالمی ذمہ داری: حزب اللہ
گذشتہ رات حزب اللہ نے اپنے ایک بیان میں کہا کہ لبنان پر گذشتہ 15 ماہ سے جاری قابض اسرائیل کی مسلسل جارحیت کا کوئی جواز نہیں ہے اور اس کا مقابلہ کرنا ایک جائز حق ہے۔ بیان میں واضح کیا گیا کہ مزاحمت کی کارروائیاں قومی مفادات اور امن و استحکام کی بحالی کے لیے ہیں۔
حزب اللہ نے عالمی برادری اور ذمہ دار حلقوں سے مطالبہ کیا ہے کہ وہ لبنان میں جاری صہیونی سفاکیت کو فوری طور پر روکنے کے لیے اپنا کردار ادا کریں، کیونکہ تمام تر سفارتی کوششیں قابض دشمن کو جنگ بندی کے معاہدے پر عملدرآمد کروانے میں ناکام رہی ہیں۔ بیان میں دو ٹوک الفاظ میں کہا گیا ہے کہ دشمن کی جانب سے قتل و غارت گری اور تباہی کا سلسلہ بغیر کسی جواب کے جاری نہیں رہنے دیا جائے گا اور تمام دستیاب وسائل کے ساتھ اس کا مقابلہ کیا جائے گا۔
