غزہ میں ایک بارپھر بجلی کا بحران، کئی علاقے اندھیرے میں ڈوب گئے

غزہ کی پٹی میں اسرائیل کی جانب سے بجلی کی سپلائی منقطع کیے جانے کی وجہ سے شہر میں بجلی کا بحران ایک بار پھر شدید ہوگیا ہے۔ اطلاعات کے مطابق مغربی کنارے کی طرف سے غزہ کی پٹی کو بجلی کی فراہمی کی متعدد لائنیں بند کردی گئی ہیں جس کے باعث غزہ کے کئی گنجان آباد علاقوں اور ہسپتالوں میں بجلی کا شدید بحران پیدا ہوگیا ہے۔ دوسری جانب غزہ میں الیکٹرک سپلائی کمپنی کی جانب سے خبردار کیا گیا ہے کہ اسرائیل کی جانب سے بجلی کی عدم فراہمی کا سلسلہ مزید چند روز تک جاری رہا تو شہر میں انسانی المیہ رونما ہو سکتا ہے۔ پیر کے روز کمپنی کی جانب سے جاری ایک بیان میں کہاگیا ہے کہ اسرائیل مرحلہ وار مغربی کنارے اور غزہ کے درمیان بجلی کی سپلائی لائنیں بند کر رہا ہے، جبکہ راہداریوں کی بندش کی وجہ سےمقامی سطح پربجلی پید کرنے والے جنریٹروں کا بنیادی سامان نہ ہونے کی وجہ سے بجلی کی فراہمی میں مشکلات دو چند ہوگئی ہیں۔ بیان میں کہا گیا ہے کہ گذشتہ برس دسمبر میں اسرائیل کے غزہ پر کیے گئے حملے میں بڑے پیمانے پر بجلی کے کھمبوں اور تاروں کو نقصان پہنچا تھا، جن کی مرمت اور بحالی کے لیے سازو سامان کی اشد ضرورت ہے۔ راہ داریاں بند ہونے اور مرمتی سامان نہ ہونے کے باعث اس سلسلے میں تاحال کوئی خاطر خواہ کام نہیں کیا جا سکا۔ غزہ بجلی سپلائی کمپنی کا مزید کہنا ہے کہ شہر میں بجلی کی شارٹیج مزید چند روز تک برقرار رہی تو شہر میں نظام زندگی مفلوج ہو کر رہ جائے گا۔ بجلی کی عدم فراہمی کی وجہ سے سکولوں اور ہسپتالوں میں شہریوں کو دشواریوں کا سامنا کرنا پڑ رہا ہے۔